संघर्षक्रांती वृत्तवेध - श्रीगोंदा 

दि.13 फेब्रुवारी 2026

(उज्वला उल्हारे)

 मानवाला आपले भौतिक जीवनमान सुधारायचे असेल तर शिक्षण घेतल्याशिवाय पर्याय नाही ही गोष्ट बहुतेकांच्या लक्षात आलेली असून शिक्षण घेतलेला प्रत्येकजण सुशिक्षितच असेल याची खात्री देता येत नाही. कुटुंबियांनी केलेले संस्कार आणि समाजाकडून झालेली जडणघडण यातूनच माणूस घडत असतो असे प्रतिपादन म.सा.प.संभाजीनगर केंद्रीय कार्यकारिणीचे संचालक तथा एकता फाउंडेशन चे संस्थापक अध्यक्ष, जेष्ठ साहित्यिक अनंत कराड यांनी केले. लोणी हायस्कूल लोणी येथील दहावीच्या विद्यार्थ्यांच्या निरोप समारंभात प्रमुख अतिथी म्हणून ते बोलत होते. लोणी हायस्कूल चे मुख्याध्यापक संभाजी सस्तारे यांच्या अध्यक्षतेखाली पार पडलेल्या या कार्यक्रमात कालिकादेवी महाविद्यालयाचे प्राचार्य डाॅ.विश्वास विश्वास कंधारे, सरपंच किसनदेव बडे, अंबादास बडे, शशिकांत भांडेकर यांची प्रमुख उपस्थिती होती.

         स्व.काकू व स्व.नाना यांच्या प्रतिमेस पुष्पहार अर्पण करून समारंभाची सुरुवात झाली. परिक्षेत आलेल्या अपयशामुळे खचून न जाता त्यातून धडा घेत जीवनामध्ये यशाचे शिखर गाठता येते हा माझा स्वानुभव आहे. दहावीला ज्या विषयात नापास झालो होतो त्याच विषयात पुढे पी.एच.डी. केली असे प्राचार्य डाॅ.विश्वास कंधारे यांनी उपस्थितांना सांगितले. अध्यक्षीय भाषणातून मुख्याध्यापक सस्तारे सरांनी विद्यार्थ्यांना काॅपीमुक्त परिक्षेचे महत्त्व समजावून देत त्यांच्यातील आत्मविश्वास द्विगुणित केला. भांडेकर सर, बडे सर, ढाकणे मॅम, चौधरी सर यांनीही यावेळी विद्यार्थ्यांना उज्ज्वल भविष्यासाठी शुभेच्छा दिल्या.

         याप्रसंगी दहावीच्या अनेक विद्यार्थिनींनी भाषणातून कवितेचा आधार घेत कहीं खुशी कहीं गम पद्धतीच्या आपल्या संमिश्र भावना व्यक्त केल्या. कार्यक्रमाचे बहारदार सूत्रसंचालन श्रीम.ढाकणे मॅम यांनी केले. राष्ट्रगीताने समारंभाची सांगता झाली. कार्यक्रमाच्या यशस्वीतेसाठी खेडकर सर, कंठाळे सर, कोळेकर सर, जोगदंड मॅडम, खेडकर सर, होडशिळ मॅडम, बाबासाहेब बडे, संजय ढगे यांसह सर्व शिक्षकवृंदाने परिश्रम घेतले. शाळेच्या वतीने दहावीच्या विद्यार्थ्यांना शेवटी मिष्टान्नाचा बेत ठेवला होता.