संघर्षक्रांती वृत्तवेध - श्रीगोंदा 

दि.13 फेब्रुवारी 2026

(उज्वला उल्हारे)

 आदिवासी पारधी समाजाच्या सर्वांगीण विकासासाठी शासनाने सुरू केलेल्या पारधी विकास आराखडा योजनेची पारदर्शकपणे अंमलबजावणी करून खऱ्या वंचितांपर्यंत लाभ पोहोचवावा, अशी मागणी आदिवासी शक्ती संघटनेच्या वतीने जिल्हाधिकाऱ्यांना दिलेल्या निवेदनातून करण्यात आली.

शासनाने पारधी समाजाला मुख्य प्रवाहात आणण्यासाठी ही योजना सुरू केली असली, तरी राजूर आदिवासी विकास प्रकल्प कार्यालयाच्या कामकाजाची पद्धत आणि यापूर्वीचे अनुभव पाहता अनेकदा वंचित लाभार्थ्यांना वगळून ठराविक लोकांनाच प्राधान्य देण्यात आल्याचा आरोप संघटनेने केला आहे. त्यामुळे वर्षानुवर्षे उपेक्षित राहिलेल्या पारधी समाजालाच या योजनेचा प्रत्यक्ष लाभ मिळावा, अशी मागणी करण्यात आली आहे.

यावेळी आदिवासी शक्ती संघटनेच्या अध्यक्ष जयश्री काळे यांच्यासह काजल काळे, वृषाली काळे, ऐश्वर्या काळे, योगिता काळे, उज्वला काळे, मयूर काळे, चंचल काळे, दीक्षा भोसले, रेबीन चव्हाण, कृष्णा चव्हाण, शिवानी चव्हाण, सरिता चव्हाण, कैकाई चव्हाण आदींसह मोठ्या संख्येने वंचित लाभार्थी उपस्थित होते.