संघर्षक्रांती वृत्तवेध - श्रीगोंदा 

दि.14 फेब्रुवारी 2026

(उज्वला उल्हारे)

 श्रीगोंदा तालुक्यातील धार्मिक क्षेत्रात अग्रेसर असलेल्या लिंपणगावचे ग्रामदैवत श्री सिद्धेश्वर महाराजांचा यात्रा उत्सव रविवारी15 फेब्रुवारी रोजी प्रारंभ होत आहे. दरम्यान याच पंचक्रोशीतील लिंगाळेश्वर महाराजांचा यात्रा उत्सव मोठ्या उत्साही वातावरणात संपन्न झाला लिंपणगावच्या लिंपणगावच्या यात्रोत्सवानिमित्त यात्रा कमिटी कडून तीन दिवस विविध धार्मिक व सांस्कृतिक कार्यक्रमाचे आयोजन करण्यात आल्याचे यात्रा कमिटी कडून सांगण्यात येत आहे. 

दरम्यान यात्रेच्या पहिल्या दिवशी महाशिवरात्र असल्याने लिंपणगाव पंचक्रोशीतून सिद्धेश्वर महाराजांना पहाटेच कुटुंबांसमवेत महाभिषेक घालण्यात येतो. त्यानंतर रविवारी 15 फेब्रुवारी रोजी सायंकाळी 9 ते रात्री 11.30 महाशिवरात्रीच्या पार्श्वभूमीवर जेष्ठ कीर्तनकार हरिभाऊ महाराज गिते दिघोळ यांचे हरिकीर्तन होणार आहे. त्यानंतर दुसऱ्या दिवशी सोमवारी 16 फेब्रुवारी रोजी सकाळपासून पंचक्रोशीतील ग्रामस्थांकडून श्री सिद्धेश्वर महाराजांना वाजत गाजत शेरनी वाटपाचा कार्यक्रम होणार आहे. दरम्यान  16 फेब्रुवारी रोजी रात्री 8 ते 11 या वेळेत श्री सिद्धेश्वर महाराजांची पालखी द्वारे मिरवणूक सोहळा आयोजित करण्यात आला आहे. मिरवणूक सोहळ्या दरम्यान शोभेचे दारू काम हे डोळ्याचे पारणे फेडणारे असते त्यानंतर रात्री 11 वाजता सिद्धेश्वर महाराजांना गावच्या वतीने महाभिषेक घालण्यात येणार आहे. त्याच रात्री मंगला बनसोडे सह नितीन कुमार बनसोडे यांचा बहुरंगी लोकनाट्याचा कार्यक्रम आयोजित करण्यात आला आहे. दुसऱ्या मंगळवार 17 फेब्रुवारी रोजी मंगला व नितीन कुमार बनसोडे यांचा हजर्याचा लोकनाट्य कार्यक्रम होणार आहे आणि त्याच दिवशी साडेतीन ते सहा वाजेपर्यंत मल्लांसाठी जंगी आखाड्याचे देखील आयोजन करण्यात आले आहे.

दरम्यान लिंपणगावचे सिद्धेश्वर महाराज ग्रामदैवत हे नवसाला पावणारे देवस्थान असल्याने महाशिवरात्री दिवशी अनेक दूर वरून भाविक भक्त आपल्या नवस्फूर्तीसाठी मंदिरात हजेरी लावतात. या दैवतावर अपार श्रद्धा असल्याने भाविक नतमस्तक होतात. महाभिषेक घालतात. त्यामुळे तालुक्यात या गावच्या यात्रेला मोठे महत्त्व प्राप्त होताना दिसत आहे. दरम्यान गावच्या ग्रामपंचायतीच्या कारभारावर सरपंच, उपसरपंच व सदस्य मंडळ बरखास्त असल्याने सद्यस्थितीला प्रशासक हे काम पाहत आहेत. परंतु अनेक वर्षापासून तरुण कार्यकर्त्यांनी एकत्र येत यात्रा उत्सव साजरा केला जातो. याही वर्षी उत्साही वातावरणात यात्रा कमिटी कडून यात्रा सुरक्षित पार पाडण्यासाठी पोलीस बंदोबस्त देखील तैनात करण्यात आल्याचे समजते. भाविक भक्तांनी शिस्तीचे पालन करून या आयोजित धार्मिक व संस्कृती कार्यक्रमाचा आनंद घ्यावा, असे आवाहन यात्रा कमिटी कडून करण्यात येत आहे.