संघर्षक्रांती वृत्तवेध - श्रीगोंदा 

दि.12 फेब्रुवारी 2026

(उज्वला उल्हारे)

 जिद्द, शिस्त आणि कठोर सरावाच्या बळावर वेंकटेश पोदार लर्न स्कूलच्या विद्यार्थ्यांनी डी.एस.ओ. पुणे विभागीय शास्त्रांग मार्शल आर्ट स्पर्धेत सुवर्ण-रौप्य पदकांची आतषबाजी करत ऐतिहासिक कामगिरी नोंदवली. सोलापूर येथे दि. ११ फेब्रुवारी २०२६ रोजी पार पडलेल्या या स्पर्धेत विद्यार्थ्यांनी आपल्या कौशल्याची आणि आत्मविश्वासाची प्रभावी छाप उमटवली.

१९ वर्षांखालील मुलांच्या गटात सम्राटराजे पाचपुते याने अप्रतिम तांत्रिक कौशल्य आणि धडाडीच्या खेळाच्या जोरावर सुवर्णपदक पटकावले. मुलींच्या १९ वर्षांखालील गटात ईशा गोरे हिनेही शानदार प्रदर्शन करत सुवर्णपदक आपल्या नावावर केले. तसेच वेदश्री ढवळे आणि मृणाली सावंत यांनी जिद्दीने लढत प्रत्येकी रौप्यपदक मिळवून शाळेच्या यशात मोलाची भर घातली.

या दैदिप्यमान यशामागे क्रीडा शिक्षक बाबू बळे सर यांचे शिस्तबद्ध प्रशिक्षण, सातत्यपूर्ण मार्गदर्शन आणि विद्यार्थ्यांची अथक मेहनत हेच यशाचे खरे सूत्र ठरले. त्यांच्या प्रेरणेने विद्यार्थ्यांनी स्पर्धेत उत्कृष्ट कामगिरी साकारली, अशी भावना शाळा व्यवस्थापनाने व्यक्त केली.

शाळेचे संचालक आनंद शहा सर तसेच सर्व विश्वस्त सदस्यांनी विजेत्या विद्यार्थ्यांचे कौतुक करून त्यांना पुढील स्पर्धांसाठी शुभेच्छा दिल्या. या यशामुळे संपूर्ण शाळा परिवारात आनंदाचे आणि अभिमानाचे वातावरण निर्माण झाले असून सर्व स्तरांतून अभिनंदनाचा वर्षाव होत आहे.

पोदार लर्न स्कूलने क्रीडा क्षेत्रातही आपला ठसा उमटवत राज्यस्तरावर दमदार उपस्थिती दर्शवली असून भविष्यात राष्ट्रीय स्तरावरही अशीच सुवर्ण झेप घेण्याचा निर्धार व्यक्त करण्यात येत आहे.