संघर्षक्रांती वृत्तवेध - श्रीगोंदा 

दि.26 जानेवारी 2026

(उज्वला उल्हारे)

प्रेरणा अपंग सेवाभावी संस्था व प्रेरणा अपंग संघटनेच्या वतीने सामाजिक, शैक्षणिक व सेवाभावी कार्यात उल्लेखनीय योगदान दिल्याबद्दल मा. श्री. बाळासाहेब (संदीप) पिपाडा यांना छत्रपती शिवाजी महाराज राज्यस्तरीय समाजभूषण पुरस्कार प्रदान करण्यात आला. हा सन्मान सोहळा श्रीगोंदा शहराचे ग्रामदैवत असलेल्या श्री संत शेख महंमद महाराज मंदिर येथे भक्तिमय वातावरणात पार पडला.

या पुरस्कार वितरण कार्यक्रमात प्रेरणा अपंग संघटनेचे अध्यक्ष श्री. राजेंद्रजी पोकळे व नगरसेवक अमिनभाई शेख यांच्या शुभहस्ते मा. बाळासाहेब (संदीप) पिपाडा यांना सन्मानचिन्ह व प्रशस्तिपत्र देऊन गौरविण्यात आले. यावेळी उपस्थित मान्यवरांनी त्यांच्या सामाजिक कार्याचा गौरव करत, समाजातील विविध घटकांसाठी त्यांनी केलेल्या कार्याची प्रशंसा केली.

कार्यक्रमादरम्यान बोलताना मान्यवरांनी सांगितले की, समाजात सकारात्मक परिवर्तन घडवून आणण्यासाठी सेवाभावी वृत्ती, निस्वार्थ काम आणि सातत्य अत्यंत आवश्यक आहे. मा. बाळासाहेब (संदीप) पिपाडा यांनी समाजसेवेच्या माध्यमातून गरजू, अपंग व दुर्बल घटकांसाठी केलेले कार्य प्रेरणादायी असून ते अनेकांसाठी मार्गदर्शक ठरत आहे.

पुरस्कार स्वीकारताना मा. बाळासाहेब (संदीप) पिपाडा यांनी प्रेरणा अपंग सेवाभावी संस्था, प्रेरणा अपंग संघटना तसेच सर्व उपस्थितांचे आभार मानले. भविष्यातही समाजहितासाठी कार्यरत राहण्याचा संकल्प त्यांनी यावेळी व्यक्त केला.

या सोहळ्यास सामाजिक कार्यकर्ते, नागरिक, भक्तगण व संस्थेचे पदाधिकारी मोठ्या संख्येने उपस्थित होते. कार्यक्रमामुळे समाजसेवेच्या कार्याला नवी ऊर्जा व प्रेरणा मिळाल्याची भावना उपस्थितांमध्ये व्यक्त करण्यात आली.