संघर्षक्रांती वृत्तवेध - श्रीगोंदा 

दि.25 जानेवारी 2026

(उज्वला उल्हारे)

आदर्श गाव म्हणून ओळख असलेल्या तांदळी दुमाला येथे मुख्यमंत्री समृद्ध पंचायतराज अभियान अंतर्गत महिलांसाठी आयोजित हळदीकुंकू कार्यक्रम मोठ्या उत्साहात व सामाजिक उपक्रमांच्या साक्षीने संपन्न झाला. या कार्यक्रमातून महिलांच्या सहभागातून ग्रामविकास अधिक बळकट होतो, असे प्रतिपादन नगराध्यक्षा मा. सुनीताताई संतोष खेतमाळीस यांनी केले.

कार्यक्रमाच्या अध्यक्षस्थानी माजी लोकनियुक्त सरपंच अनिताताई निगडे या होत्या. कार्यक्रमाचे सूत्रसंचालन ग्रामपंचायत अधिकारी मनीषा काळंगे यांनी केले.

यावेळी सार्वजनिक प्लास्टिकमुक्ती, बालविवाहमुक्त गाव याबाबत उपस्थित महिलांना शपथ देण्यात आली. तसेच आढळगाव पी.एस.सी. यांच्या वतीने महिलांची मोफत आरोग्य तपासणी करण्यात आली. समाजातील एकल महिलांचा सन्मान करण्यात येऊन सामाजिक भान जपण्यात आले.

कार्यक्रमात ओला-सुका कचरा व्यवस्थापन याबाबत सविस्तर मार्गदर्शन करण्यात आले व ग्रामस्थांना डस्टबिनचे वाटप करण्यात आले. याशिवाय जिल्हा परिषद शाळेमध्ये वृक्षारोपण करण्यात आले. यावेळी ऑक्सिजनचे महत्त्व, गाव विकास - एक उपाय या विषयावर श्रीगोंदा नगरपरिषद उपाध्यक्षा अलकाताई सुनील अनभुले (दरेकर) यांनी महिलांना विशेष मार्गदर्शन केले.

हा कार्यक्रम जिल्हा परिषदेचे मुख्य कार्यकारी अधिकारी आनंद भंडारी, ग्रामपंचायत विभागाचे उपमुख्य कार्यकारी अधिकारी दादाभाऊ गुंजाळ, श्रीगोंदा गटविकास अधिकारी राणीताई फराटे, तसेच विस्तार अधिकारी सारिका हराळ यांच्या मार्गदर्शनाखाली यशस्वीपणे पार पडला.

कार्यक्रमास नगराध्यक्षा सुनीताताई संतोष खेतमाळीस, उपनगराध्यक्षा अलकाताई सुनील अनभुले, गावचे लोकनियुक्त सरपंच संजय निगडे (अण्णा), उपसरपंच वैशालीताई संतोष हराळ, ग्रामपंचायत सदस्य सुनिता भोस, मंगलताई धालवडे, आशाबाई भोस, सारिका बोरुडे, वर्षा काळे-वाघ, झुंबर खुरांगे, रामदास गंगाधरे, श्रीकृष्ण धावडे, भरत शेळके, माजी उपसरपंच राजेंद्र भोस, नानासाहेब हराळ, व्हाईस चेअरमन हौसराव बोरुडे, माजी सरपंच निलेश शेठ शेळके, संचालक बापू शेळके, स्कूल कमिटी अध्यक्ष युवराज जाधव, उपाध्यक्ष नवनाथ भोस, सामाजिक कार्यकर्ते लक्ष्मण भोस, ग्रामपंचायत माजी सदस्य, पत्रकार संपादक मेजर उल्हारे, पत्रकार उज्वला उल्हारे, तसेच मोठ्या संख्येने ग्रामस्थ व ग्रामपंचायत कर्मचारी उपस्थित होते.

महिलांच्या सहभागातून स्वच्छता, आरोग्य, पर्यावरण आणि सामाजिक बांधिलकीचा संदेश देणारा हा कार्यक्रम तांदळी दुमाला ग्रामविकासाचा एक प्रेरणादायी आदर्श ठरत असल्याची भावना उपस्थित मान्यवरांनी व्यक्त केली.