संघर्षक्रांती वृत्तवेध - श्रीगोंदा 

दि.19 जानेवारी 2026

(उज्वला उल्हारे)

दररोजच्या धावपळीच्या जीवनात जगणारा माणूस सध्या संकुचित वृत्तीने ग्रस्त होत आहे, स्वतःच्या सुखासाठी अहोरात्र झटणारा माणूस इतरांना कमी समजण्याची चूक करू लागला आहे. समाजातील प्रत्येक घटक हा सारखाच महत्वाचा आहे, त्यामुळे प्रत्येकाने समाजात राहत असताना सामाजिक कार्ये करून समाजाच्या विकासासाठी हातभार लावावा आणि आपल्याप्रमाणे इतरांच्या ही सुखात सहभागी होऊन त्यांच्याही जगण्यावर प्रेम करावे असे आवाहन प्रसिद्ध व्याख्याते शिवशाहीर विक्रम अवचिते यांनी केले.

सावित्रीबाई फुले पुणे विद्यापीठ आणि बाणेश्वर शिक्षण संस्थेचे आर्टस्, सायन्स, अँड कॉमर्स कॉलेज, बुऱ्हाण नगर यांच्या संयुक्त विद्यमाने आयोजित डॉ. बाबासाहेब जयकर व्याख्यानमाला  संपन्न झाली. तीन दिवसीय व्याख्यानमालेत नामांकित वक्त्यांची व्याख्याने झाली, यावेळी तिसरे आणि शेवटचे व्याख्यान प्रसिद्ध व्याख्याते शिवशाहीर विक्रम अवचिते यांनी  जगण्यावर शतदा प्रेम करावे या विषयावर दिले.

यावेळी प्राचार्य श्री. जाधव सर, केंद्र कार्यवाहक प्रा.मयुरी बारवकर मॅडम, प्रा. ब्राम्हणे सर, प्रा.शेख सर, उपस्थित होते, तसेच मोठ्या संख्येने विद्यार्थी उपस्थित होते. 

दिवंगत आमदार कै. कर्डीले साहेब यांनी ग्रामीण भागातील गोरगरीब जनतेच्या मुलांसाठी शिक्षणसंस्था उभारली, इतरांच्या चेहऱ्यावर आनंद निर्माण केला, गोरगरीब जनतेच्या अडचणी समजून त्यावर मार्ग काढला, खऱ्या अर्थाने साहेब इतरांसाठी जगले, त्यामुळे आपण त्यांचे सदैव स्मरण ठेवावे, तसेच इतरांच्या कल्याणासाठी कार्य करावे असे आवाहन यावेळी केले.

संत ज्ञानेश्वर महाराजांनी विश्वाच्या कल्याणासाठी पसायदान मागितले, छत्रपती शिवाजी महाराजांनी रायतेसाठी स्वराज्य स्थापन केले, या लोकांना जीवनाचा खरा अर्थ समजला म्हणून ते किर्तीवंत झाले, त्यांचा आदर्श आपण ठेवला पाहिजे असे प्रतिपादन यावेळी त्यांनी केले.