संघर्षक्रांती वृत्तवेध - श्रीगोंदा 

दि.18 जानेवारी 2026

(उज्वला उल्हारे)

मुख्यमंत्री देवेंद्र फडणवीस यांनी पुणे येथे आंतरराष्ट्रीय सायकलिंग पुणे ग्रँड टूर 2026 अंतर्गत खेळाडूंचा सत्कार केला. यासोबतच या ग्रँड टूर निमित्त आयोजित कार्यक्रम सर्वांसाठी खुले झाल्याचे घोषित केले. 

सुमारे 35 देशांमधील खेळाडूंच्या सहभागाने पुण्यात सुरू होत असलेला हा उपक्रम केवळ एक क्रीडा कार्यक्रम नसून, दीर्घकालीन परंपरा निर्माण करणारा जागतिक दर्जाचा सोहळा ठरेल, असा विश्वास मुख्यमंत्री फडणवीस यांनी व्यक्त केला.

मुख्यमंत्री फडणवीस म्हणाले की, पुणे ही केवळ सांस्कृतिक राजधानी नाही, तर तंत्रज्ञान, उत्पादन क्षेत्र आणि वेगाने विकसित होणाऱ्या भविष्यातील शहराचे प्रतीक आहे. इतिहास आणि आधुनिकतेचा संगम असलेल्या पुणे जिल्ह्याचे भौगोलिक वैविध्य, पश्चिम घाटांचे नैसर्गिक सौंदर्य, समृद्ध सांस्कृतिक वारसा आणि पुणेकरांचा उत्साह या ग्रँड टूरला एक वेगळी ओळख देईल. 

ही ग्रँड टूर पुढील काळात जागतिक स्पोर्ट्स कॅलेंडरवरील महत्त्वाचा कार्यक्रम ठरेल आणि क्रीडा पर्यटनाच्या जागतिक नकाशावर पुण्याचा ठसा अधिक ठळक करेल, असा विश्वास मुख्यमंत्री फडणवीस यांनी यावेळी व्यक्त केला. या निमित्ताने देश-विदेशातील पर्यटकांना छत्रपती शिवाजी महाराज यांचे किल्ले, निसर्गसौंदर्य आणि महाराष्ट्राची समृद्ध परंपरा अनुभवता येईल, असे सांगत मुख्यमंत्री फडणवीस यांनी सर्व खेळाडूंना महाराष्ट्र शासनाच्या वतीने उत्तम सुविधा पुरवण्याचे आश्वासन दिले.

मुख्यमंत्री फडणवीस यांनी यावेळी खेळाडूंसाठी येथे जागतिक मानकांनुसार आवश्यक असलेल्या सर्व सुविधा उपलब्ध करून दिल्याबद्दल आयोजक आणि संबंधित विभागांचे अभिनंदन केले.

यावेळी केंद्रीय राज्यमंत्री मुरलीधर मोहोळ, मंत्री चंद्रकांत पाटील, राज्यमंत्री माधुरी मिसाळ तसेच इतर मान्यवर उपस्थित होते.