संघर्षक्रांती वृत्तवेध - श्रीगोंदा 

दि.16 जानेवारी 2026

(उज्वला उल्हारे)

 महाराष्ट्रातील २९ महानगरपालिकांपैकी तब्बल २७ महानगरपालिकांवर भारतीय जनता पार्टी व मित्र पक्षांनी सत्ता स्थापन केल्याबद्दल श्रीगोंदा शहरात जल्लोषाचे वातावरण पाहायला मिळाले. या ऐतिहासिक विजयाच्या आनंदात आज श्रीगोंदा शहरातील माऊली संपर्क कार्यालय येथे भाजपाच्या पदाधिकाऱ्यांनी व कार्यकर्त्यांनी लाडू वाटून तसेच फटाके फोडून विजयी जल्लोष साजरा केला.

या आनंदोत्सव कार्यक्रमाला श्रीगोंदा नगर परिषदेच्या नगराध्यक्षा श्रीमती सुनिताताई संतोष खेतमाळीस यांची प्रमुख उपस्थिती होती. यावेळी भारतीय जनता पार्टीचे सर्व नगरसेवक, शहर व तालुका पदाधिकारी मोठ्या संख्येने उपस्थित होते. सर्वांनी एकत्र येत पक्षाच्या या घवघवीत यशाचा आनंद साजरा केला.

कार्यक्रमात बोलताना नगराध्यक्षा सुनिताताई खेतमाळीस यांनी भाजपावर जनतेने दाखविलेल्या विश्वासाबद्दल आभार व्यक्त केले. हा विजय म्हणजे पंतप्रधान नरेंद्र मोदी व मुख्यमंत्री देवेंद्र फडणवीस यांच्या नेतृत्वावर जनतेने व्यक्त केलेला विश्वास असल्याचे त्यांनी नमूद केले. आगामी काळात नागरिकांच्या अपेक्षांवर खरे उतरून अधिक जोमाने, पारदर्शक आणि विकासाभिमुख काम करण्याचा निर्धार त्यांनी व्यक्त केला.

यावेळी उपस्थित पदाधिकाऱ्यांनी देखील राज्यभरात मिळालेल्या यशाबद्दल समाधान व्यक्त करत भाजपाच्या विकासात्मक धोरणांमुळेच जनता पुन्हा पुन्हा पक्षाला संधी देत असल्याचे सांगितले. श्रीगोंदा शहराच्या सर्वांगीण विकासासाठी एकजुटीने काम करण्याचा संकल्प उपस्थितांनी केला.

कार्यक्रमात जल्लोष, घोषणाबाजी व आनंदोत्सवाच्या वातावरणात भाजपाच्या यशाचे स्वागत करण्यात आले. श्रीगोंदा शहरात भाजपाचा विजय म्हणजे विकासाच्या दिशेने टाकलेले आणखी एक पाऊल असल्याची भावना कार्यकर्त्यांमध्ये दिसून आली.