संघर्षक्रांती वृत्तवेध - श्रीगोंदा 

दि.16 जानेवारी 2026

(उज्वला उल्हारे)

श्रीगोंदा तालुक्यातील म्हातारपिंप्री जिल्हा परिषद प्राथमिक शाळेत नुकतेच वृक्षारोपण कार्यक्रम पार पडला. प्रा. संदीप ससाणे यांच्या पुढाकारातून आयोजित या उपक्रमात विद्यार्थ्यांसह सहकारी शिक्षक व स्थानिक नागरिकांनी मोठ्या संख्येने सहभाग नोंदविला.

या कार्यक्रमात शाळेच्या परिसरात तीन वर्षे वयाची तब्बल २० देशी वृक्षांची लागवड करण्यात आली. यामध्ये रुद्राक्ष, कैलासपती, मोहगनी, अर्जुन यांसारख्या उपयुक्त व पर्यावरणपूरक वृक्षांचा समावेश होता. केवळ वृक्षारोपणावरच न थांबता झाडांचे संगोपन, नियमित पाणीपुरवठा व संरक्षण यावर विशेष भर देण्याचा संकल्प यावेळी करण्यात आला.

प्रा. संदीप ससाणे हे एक शिक्षक म्हणून विद्यार्थ्यांमध्ये पर्यावरणाबाबत जागरूकता निर्माण करण्याचे काम सातत्याने करत असून एक विद्यार्थी – एक झाड या संकल्पनेला ते प्रोत्साहन देत आहेत. विद्यार्थ्यांना वृक्षांचे महत्व समजावून सांगत त्यांच्यामध्ये निसर्गप्रेम निर्माण करण्यासाठी ते प्रयत्नशील आहेत.

या वृक्षारोपण कार्यक्रमासाठी प्रा. डॉ. बापू देवकर, देविदास हिरडे होते, अग्निपंख फाउंडेशनचे बाळासाहेब काकडे, संत तुकाराम वृक्ष संवर्धन समितीचे अध्यक्ष नवनाथ दरेकर यांची उपस्थिती लाभली. सर्व मान्यवरांनी या उपक्रमाचे कौतुक करून पर्यावरण संवर्धनासाठी असे उपक्रम सातत्याने राबविण्याचे आवाहन केले.

आजच्या धकाधकीच्या जीवनात अनेकजण नातेसंबंध आणि सामाजिक जबाबदाऱ्या विसरत चालले आहेत. मात्र अशा काळातही आपल्या कृतीतून समाजाला सकारात्मक संदेश देणारे काही प्रेरणादायी व्यक्तिमत्त्वे असतात. प्रा. संदीप ससाणे हे त्यापैकीच एक आहेत. त्यांनी आपल्या वडिलांच्या स्मृतीप्रित्यर्थ हा वृक्षारोपणाचा उपक्रम राबवून पर्यावरण संवर्धनासोबतच भावनिक नात्यांचे महत्व अधोरेखित केले आहे.

त्यांच्या या उपक्रमामुळे विद्यार्थ्यांमध्ये पर्यावरण जाणीव वाढीस लागली असून ग्रामस्थांमध्येही सकारात्मक प्रतिसाद मिळत आहे. अशा उपक्रमांमुळे भावी पिढी अधिक जबाबदार आणि निसर्गप्रेमी घडेल, असा विश्वास व्यक्त केला जात आहे.