संघर्षक्रांती वृत्तवेध - श्रीगोंदा 

दि. 4 एप्रिल 2026

(उज्वला उल्हारे)

महाराष्ट्राचे  आराध्य दैवत छत्रपती शिवाजी महाराजांच्या पुण्यतिथी निमित्त स्वराज्याची राजधानी किल्ले रायगड येथे विविध कार्यक्रमांचे आयोजन करण्यात आले होते. 

यावेळी मान्यवर व्यक्तींच्या मुलाखती, पुरस्कार वितरण, तसेच इतर अनेक कार्यक्रम आयोजित करण्यात आले होते, तसेच रात्री राजसदरेवर अहिल्यानगर जिल्ह्यातील निंबवी येथील शिवशाहीर विक्रम अवचिते निंबवीकर यांचा शाहिरी पोवाड्याचा कार्यक्रम मोठ्या उत्साहात संपन्न झाला. 

या कार्यक्रमासाठी राज्यसभा खासदार मा. सुधांशु त्रिवेदी हे प्रमुख पाहुणे होते. यावेळी ब्रिगेडियर संग्राम मोहिते, नागपूरचे मुधोजीराजे भोसले, दुर्ग अभ्यासक श्री आनंद पाळंदे, कॅबिनेट मंत्री आदिती तटकरे, आमदार भरत गोगावले, श्री शिवाजी रायगड स्मारक समिती व शिवचरित्र साहित्य प्रकाशन समिती प्रमुख श्री सुधीरजी थोरात आदी उपस्थित होते.

यावेळी महाराष्ट्राच्या कानाकोपऱ्यातून आलेले मावळे मोठ्या प्रमाणात उपस्थित होते. शिवशाहीर विक्रम अवचिते यांनी आपल्या पहाडी आणि धारदार शैलीत पोवाडा आणि स्फूर्तिगीते सादर करून उपस्थितांची मने जिंकली आणि छत्रपती शिवाजी महाराजांना अभिवादन केले.  शिवशाहीर विक्रम अवचिते यांचा राजसदरेवर सन्मान करण्यात आला. 

स्वराज्याची राजधानी किल्ले रायगडावर, छत्रपती शिवाजी महाराजांच्या सिंहासनासमोर राजसदरेवर आपली कला सादर करण्याची संधी मिळणे आणि सन्मान होणे हा माझ्या आयुष्यातील आणि शाहिरी क्षेत्रातील सर्वोच्च सन्मान असल्याची भावना शाहिरांनी व्यक्त केली.

चौकट-

या कार्यक्रम निमित्ताने निंबवी ग्रामस्थ, तसेच वारकरी आणि  विविध क्षेत्रातील मान्यवर, ज्येष्ठ शाहीर दादा पासलकर, महाराष्ट्र शाहीर परिषद पुणे, मुंबई पोलीस उपायुक्त श्री. गणेश गावडे साहेब, श्री राहुल गावडे साहेब, डॉ. गोपालकृष्ण गावडे साहेब, उद्योजक श्री. अनिरुद्ध शिर्के साहेब, श्री. भास्कर गावडे साहेब, तसेच मित्रपरिवार यांचेकडून शिवशाहीर विक्रम अवचिते यांचे अभिनंदन करण्यात आले.