संघर्षक्रांती वृत्तवेध - श्रीगोंदा 

दि.7 मार्च 2026

(उज्वला उल्हारे)

शेवगाव आगारातून मढी मार्गे मायांबा या तीर्थक्षेत्राकडे जाणाऱ्या एसटी बसफेऱ्या सुरू करण्यात आल्याने नाथभक्तांची मोठी गैरसोय दूर झाली आहे. यात्रेच्या काळात मोठ्या संख्येने भाविक श्री क्षेत्र मढी येथे दर्शनासाठी येत असल्याने वाहतुकीची सोय उपलब्ध व्हावी, यासाठी आमदार मोनिका ताई राजळे यांनी शेवगाव आगार प्रमुखांना आवश्यक सूचना दिल्या होत्या. त्यांच्या आदेशानंतर या मार्गावर बससेवा सुरू करण्यात आली.

नाथपंथीयांचे श्रद्धास्थान असलेल्या श्री क्षेत्र मढी येथे दरवर्षी हजारो भाविक दर्शनासाठी येत असतात. मच्छिंद्रनाथ महाराजांच्या संजीवन समाधीचे दर्शन घेण्यासाठी येणाऱ्या भाविकांना वाहतुकीच्या सोयीअभावी अडचणींचा सामना करावा लागत होता. ही बाब लक्षात घेऊन मढी मार्गे मायांबा या तीर्थक्षेत्रासाठी एसटी बसफेऱ्या सुरू करण्यात आल्या आहेत. त्यामुळे भाविकांचा प्रवास अधिक सुलभ झाला आहे.

या बससेवेचा शुभारंभ झाल्यानंतर श्री कानिफनाथ देवस्थानचे अध्यक्ष विठ्ठल मरकड, विश्वस्त उत्तमराव मरकड, विश्वस्त मदन मरकड, देवस्थानचे अधिकारी अशोक पवार यांच्यासह कर्मचारी, गावकरी आणि नाथभक्तांनी बसला हार घालून व नारळ फोडून पूजन केले. या वेळी भाविकांनी बससेवेचे स्वागत करत समाधान व्यक्त केले.

शेवगाव आगारातून शेवगाव, तिसगाव, मढी, घाटशिरस, वृद्धेश्वर आणि मायांबा या तीर्थक्षेत्रांपर्यंत ही बससेवा सुरू करण्यात आली आहे. त्यामुळे श्री क्षेत्र मढी, आदिनाथ वृद्धेश्वर तसेच मायांबा येथे दर्शनासाठी जाणाऱ्या भाविकांना मोठी सुविधा उपलब्ध झाली आहे.

नवीन वेळापत्रकानुसार सकाळी ८.३० वाजता शेवगाव येथून बस सुटून सकाळी ९.१५ वाजता श्री क्षेत्र मढी येथे पोहोचते. त्यानंतर सकाळी १०.४५ वाजता मायांबा येथून बस सुटून दुपारी १२.०० वाजता श्री क्षेत्र मढी येथे येते. तसेच संध्याकाळी ५.३० वाजता शेवगाव येथून दुसरी फेरी सुटून सायंकाळी ६.१५ वाजता मढी येथे पोहोचते. तर दुसऱ्या दिवशी सकाळी ६.१५ वाजता मायांबा येथून बस सुटून सकाळी ७.३० वाजता श्री क्षेत्र मढी येथे पोहोचते.

या बससेवेच्या माध्यमातून मढी, वृद्धेश्वर आणि मायांबा या तीर्थक्षेत्रांकडे जाणाऱ्या भाविकांना मोठी सोय झाली असून यात्रेच्या काळात वाहतुकीची समस्या मोठ्या प्रमाणात कमी होणार आहे. भाविकांनीही या निर्णयाबद्दल समाधान व्यक्त करत आमदार मोनिका ताई राजळे व एसटी प्रशासनाचे आभार मानले.