संघर्षक्रांती वृत्तवेध - श्रीगोंदा 

दि. 19 मार्च 2026

(उज्वला उल्हारे)

कर्जत तालुक्यातील कोंभळी येथे श्री चैतन्य कानिफनाथ मंदिर यांच्या २२ व्या वर्धापन दिनानिमित्त भव्य कीर्तन महोत्सव व नवनाथ भक्तिसार ग्रंथ पारायण सोहळ्याचे आयोजन करण्यात आले असून, या सोहळ्यामुळे पंचक्रोशीत भक्ती, श्रद्धा व आध्यात्मिकतेचा उत्सव होणार आहे.

रविवार, दि. २२ मार्च २०२६ पासून सुरू होणारा हा धार्मिक सोहळा गुरुवार, दि. २६ मार्च २०२६ रोजी सांगता होणार आहे. या कालावधीत दररोज सकाळी नवनाथ भक्तिसार ग्रंथ पारायणाचे आयोजन करण्यात येणार असून, सायंकाळी नामांकित कीर्तनकारांच्या ओजस्वी कीर्तन सेवेमुळे भाविकांना आध्यात्मिक समाधानाचा अनुभव मिळणार आहे.

कीर्तन सेवेचे मानकरी पुढीलप्रमाणे :-

ह.भ.प. अविनाश महाराज साळुंके (झी टॉकीज फेम)

ह.भ.प. महाराष्ट्र भूषण कबीर महाराज आत्तार (शिवचरित्रकार)

ह.भ.प. कीर्तन केसरी संतोष महाराज वनवे

ह.भ.प. धर्मभूषण निलेश महाराज चव्हाण

ह.भ.प. भागवताचार्य सोपान महाराज सानप

या सर्व कीर्तनकारांच्या प्रबोधनपर, प्रभावी आणि विचारमूल्यांनी समृद्ध कीर्तनातून संत परंपरेचे विचार, समाजजागृती व अध्यात्मिक मार्गदर्शन भाविकांपर्यंत पोहोचवले जाणार आहे. त्यांच्या उपस्थितीमुळे सोहळ्याची शोभा अधिकच वाढणार असून, हा महोत्सव भाविकांसाठी एक संस्मरणीय पर्वणी ठरणार आहे.

दररोज सायंकाळी ७ ते ९ या वेळेत कीर्तन सेवा होणार असून, त्यानंतर रात्री ९ ते ११ या वेळेत महाप्रसादाचे आयोजन करण्यात आले आहे. सोहळ्यादरम्यान विविध धार्मिक विधी, पूजाअर्चा, भजन कार्यक्रम व भक्तिगीतांचा कार्यक्रमही पार पडणार आहे.

या भव्य सोहळ्याचे आयोजन श्री चैतन्य कानिफनाथ महाराज ट्रस्ट, कोंभळी व समस्त ग्रामस्थांच्या वतीने करण्यात आले असून, पंचक्रोशीतील तसेच दूरवरून येणाऱ्या सर्व भाविकांनी मोठ्या संख्येने उपस्थित राहून या भक्तिमय सोहळ्याचा लाभ घ्यावा, असे आवाहन आयोजकांनी केले आहे.