संघर्षक्रांती वृत्तवेध - श्रीगोंदा 

दि. 19 मार्च 2026

(उज्वला उल्हारे)

श्रीगोंदा नगरपरिषद हद्दीतील नागरिकांसाठी अत्यंत दिलासादायक असा ऐतिहासिक निर्णय घेण्यात आला असून शहरात घरपट्टीवरील १०० टक्के शास्तीकर माफी जाहीर करण्यात आली आहे. राज्यात अशा प्रकारचा निर्णय घेणारी श्रीगोंदा ही पहिली नगरपरिषद ठरली आहे.

लोकनेते माजी मंत्री बबनराव पाचपुते यांच्या मार्गदर्शनाखाली, तसेच श्रीगोंदा व नगर विधानसभा मतदारसंघाचे लोकप्रिय व कार्यक्षम आमदार विक्रम दादा पाचपुते यांच्या सातत्यपूर्ण पाठपुराव्याला अखेर यश आले. राज्याचे मुख्यमंत्री देवेंद्र फडणवीस यांच्या नेतृत्वातील महायुती सरकारने हा निर्णय मंजूर केला आहे.

या निर्णयामुळे अनेक वर्षांपासून थकलेल्या घरपट्टीवरील दंडात्मक शास्तीचा मोठा बोजा नागरिकांच्या डोक्यावरून हलका झाला आहे. आर्थिक अडचणीत सापडलेल्या सर्वसामान्य नागरिकांना यामुळे मोठा दिलासा मिळणार असून, थकबाकी वसुलीला देखील गती मिळण्याची शक्यता आहे.

नगरपरिषद प्रशासनाच्या वतीने नागरिकांना आवाहन करण्यात आले आहे की, शास्तीकर माफीचा लाभ घेतल्यानंतर उर्वरित घरपट्टीची रक्कम तात्काळ भरून नगरपरिषदेला सहकार्य करावे.

लोकनियुक्त नगराध्यक्षा सुनीताताई संतोष खेतमाळीस, उपनगराध्यक्ष  अलकाताई अनभुले तसेच मुख्याधिकारी पुष्पगंधा भगत व सर्व नगरसेवकांनीही नागरिकांनी या निर्णयाचा लाभ घेत प्रलंबित थकबाकी भरावी, असे आवाहन केले आहे.

या निर्णयाबद्दल श्रीगोंद्यातील नागरिकांकडून समाधान व्यक्त होत असून, शहराच्या विकासासाठी हा निर्णय महत्त्वाचा टप्पा ठरणार असल्याची भावना व्यक्त केली जात आहे.