संघर्षक्रांती वृत्तवेध - श्रीगोंदा 

दि. 7 मे 2026

(उज्वला उल्हारे)

श्रीगोंदा कृषी उत्पन्न बाजार समिती परिसरात शेतकऱ्यांसाठी अत्याधुनिक सुविधा उपलब्ध करून देण्याच्या दृष्टीने महत्त्वपूर्ण पाऊल उचलण्यात आले असून, “राष्ट्रसंत तुकडोजी महाराज शेतकरी भवन” उभारण्यासाठी तब्बल १ कोटी ५८ लाख १३ हजार ४५८ रुपयांच्या अंदाजपत्रकास प्रशासकीय मंजुरी प्राप्त झाली आहे. या निर्णयामुळे श्रीगोंदा तालुक्यातील हजारो शेतकरी बांधवांना मोठा दिलासा मिळणार आहे.

या शेतकरी भवनात शेतकऱ्यांसाठी निवास व्यवस्था, पिण्याचे पाणी, स्वच्छतागृहे तसेच इतर आवश्यक सोयी-सुविधा उपलब्ध करून देण्यात येणार असल्याची माहिती मिळत आहे. बाजार समितीतील कामकाज अधिक सुलभ आणि शेतकरीहिताचे करण्याच्या दृष्टीने हा प्रकल्प महत्त्वाचा मानला जात आहे.

या मंजुरीबद्दल मुख्यमंत्री देवेंद्र फडवणीस तसेच महायुती सरकारचे आभार व्यक्त करण्यात आले आहेत.

आमदार विक्रमदादा पाचपुते यांनीही शेतकरी हितासाठी भविष्यात आणखी विकासकामे करण्याचा निर्धार व्यक्त केला आहे.

तालुक्यातील शेतकरी, व्यापारी व बाजार समिती परिसरातील नागरिकांकडून या निर्णयाचे स्वागत होत असून, शेतकऱ्यांसाठी हक्काचे निवारा केंद्र म्हणून या भवनाकडे पाहिले जात आहे.

चौकट - ही मंजुरी राज्याचे माजी मंत्री तथा ज्येष्ठ नेते बबनदादा पाचपुते यांच्या मार्गदर्शनाखाली आणि आमदार विक्रमदादा पाचपुते यांच्या सातत्यपूर्ण पाठपुराव्यामुळे मिळाल्याचे सांगितले जात आहे.

शासन निर्णयामध्ये नमूद केल्यानुसार, या शेतकरी भवनामुळे बाजार समितीत येणाऱ्या शेतकऱ्यांना मुक्कामासाठी सुसज्ज सुविधा उपलब्ध होणार आहेत. शेतीमाल विक्रीसाठी दूरवरून येणाऱ्या शेतकऱ्यांना रात्रभर थांबण्यासाठी योग्य व्यवस्था नसल्याने मोठ्या अडचणींचा सामना करावा लागत होता. नव्या भवनामुळे ही समस्या मोठ्या प्रमाणात सुटणार आहे.