संघर्षक्रांती वृत्तवेध - श्रीगोंदा 

दि.7 मार्च 2026

(उज्वला उल्हारे)

मिरजगाव :- येथील रुरल एज्युकेशन सोसायटीचे महात्मा फुले नूतन महाविद्यालयात दिनांक ८ मार्च 2026 रोजी कै. सुशील चेडे स्मृती करंडक खुल्या राज्यस्तरीय पासिंग हॉलीबॉल ( पुरुष ) स्पर्धेचे आयोजन केले आहे. तर दिनांक 10 मार्च 2026 रोजी कर्मयोगी डॉ. ए. बी. चेडे करंडक राज्यस्तरीय अंतर महाविद्यालयीन वक्तृत्व स्पर्धेचे आयोजन केले आहे. अशी माहिती महाविद्यालयाचे प्राचार्य डॉ. तानाजी जाधव यांनी दिली.

       सन 1972 मध्ये मा. डॉ. ए. बी. चेडे यांनी रुरल एज्युकेशन सोसायटीची स्थापना केली. त्यांच्या मार्गदर्शनाखाली गेली 55 वर्ष संस्था गुणवत्तापूर्ण शिक्षण व संस्कारक्षम पिढी घडवण्याच्या दृष्टीने मोलाचे योगदान देत आहे. कर्मयोगी डॉ. ए. बी. चेडे यांच्या शैक्षणिक सामाजिक आणि सांस्कृतिक क्षेत्रातील कार्यातून प्रेरित होऊन सदर स्पर्धा सुरू केली आहे. विद्यार्थ्यांमध्ये प्रभावी संवाद कौशल्य व सामाजिक जाणीव निर्माण व्हावी, वक्तृत्व कला विकसित व्हावी, सामाजिक, शैक्षणिक, राजकीय, राष्ट्रीय व आंतरराष्ट्रीय विषयावर चिंतन व्हावे, विद्यार्थ्यांमध्ये नेतृत्व गुण, आत्मविश्वास व धाडस निर्माण व्हावे, या हेतूने व शैक्षणिक वर्ष 2025 - 26 हे महाविद्यालयाचे रोप्य महोत्सवी वर्ष आहे, यानिमित्ताने सदर स्पर्धेचे आयोजन केलेले आहे.

मिरजगाव पंचक्रोशीतील सर्व नागरिकांनी या दोन्ही स्पर्धेचा लाभ घ्यावा. असे आवाहन रुरल एज्युकेशन सोसायटीचे अध्यक्ष कर्मयोगी डॉ. ए. बी. चेडे यांनी व संस्थेच्या सर्व पदाधिकाऱ्यांनी केले आहे.