संघर्षक्रांती वृत्तवेध - श्रीगोंदा 

दि.7 मार्च 2026

(उज्वला उल्हारे)

सावरगाव ता .आष्टी जि .बीड (मायंबा )येथे श्री क्षेत्र मच्छिंद्रनाथ देवस्थान, सावरगाव येथे नाथ संजीवन समाधी महोत्सव २०२६ मोठ्या भक्तिभावात साजरा करण्यात येणार आहे. हा महोत्सव १४ मार्च ते १९ मार्च २०२६ या कालावधीत विविध धार्मिक कार्यक्रमांनी संपन्न होणार असून राज्यासह विविध भागांतून हजारो नाथभक्त सहभागी होणार आहेत.

महोत्सवाची सुरुवात १४ मार्च रोजी सकाळी ७ वाजता होणार असून श्री मच्छिंद्रनाथ गडावरून निशाण पैठणकडे प्रस्थान करण्यात येईल. त्यानंतर १६ मार्च रोजी सकाळी ८ वाजता पैठण येथे निशाण मिरवणूक काढण्यात येणार आहे.

१८ मार्च रोजी सकाळी ११ वाजता श्री मच्छिंद्रनाथ गडावर कावडीचे आगमन होईल. त्याच दिवशी दुपारी १२ वाजता महाआरती होणार असून दुपारी १.३० ते सायंकाळी ४ वाजेपर्यंत नाथभक्तांनी पैठण, काशी व इतर तीर्थक्षेत्रांमधून कावडीने आणलेल्या पवित्र गंगाजलाने समाधीस्थळी जलाभिषेक करण्यात येणार आहे.

त्यानंतर सायंकाळी ४ वाजल्यापासून ते १९ मार्च पहाटे ५.३० वाजेपर्यंत समाधीस्थळी उटी, सुगंधी मसाले व चंदन उटी लेप लावण्याचा विशेष धार्मिक कार्यक्रम होणार आहे.

१९ मार्च रोजी पहाटे ५.३० वाजता श्री मच्छिंद्रनाथ समाधीची विधिवत महापूजा पार पडेल. त्यानंतर पहाटे ६ वाजता महाआरती होऊन भाविकांसाठी नियमित दर्शन सुरू केले जाईल.

या महोत्सवानिमित्त भाविकांसाठी व्हीआयपी पासेसचीही सुविधा उपलब्ध करण्यात आली आहे. तसेच “आपला एक दगड नाथ मंदिरासाठी” या मोहिमेअंतर्गत मंदिराच्या जीर्णोद्धारासाठी भाविक भक्तांनी सढळ हाताने देणगी देऊन सहकार्य करावे, असे आवाहन देवस्थान ट्रस्टचे अध्यक्ष, उपाध्यक्ष, सचिव, सर्व विश्वस्त तसेच सावरगाव व शेंडगेवाडी येथील ग्रामस्थ यांनी केले आहे.

श्री क्षेत्र मच्छिंद्रनाथ देवस्थान ट्रस्टच्या वतीने सर्व नाथभक्तांना या महोत्सवात मोठ्या संख्येने सहभागी होऊन चैतन्य श्री मच्छिंद्रनाथ महाराजांचे दर्शन घेण्याचे आवाहन करण्यात आले आहे. तसेच महोत्सवादरम्यान भाविकांनी स्वच्छता, शांतता व शिस्त राखून देवस्थानच्या सूचनांचे पालन करावे, असेही विश्वस्त मंडळाने नमूद केले आहे.