संघर्षक्रांती वृत्तवेध - श्रीगोंदा 

दि. 31जुलै 2026

(उज्वला उल्हारे)

पत्रकारितेतील अभ्यासपूर्ण कार्यशैली, प्रभावी संवादकौशल्य, संघटनात्मक नियोजन आणि पक्षाप्रती असलेल्या निष्ठेच्या बळावर श्रीगोंद्याचे युवा कार्यकर्ते अमोल कविटकर यांनी राज्याच्या राजकीय आणि माध्यम क्षेत्रात महत्त्वाची झेप घेतली आहे. भारतीय जनता पक्षाने त्यांची महाराष्ट्र प्रदेश भाजप माध्यम विभागाच्या दौरा समन्वयक या महत्त्वपूर्ण पदावर नियुक्ती केली असून, मुख्यालय प्रभारी रवींद्र अनासपुरे यांच्या हस्ते त्यांना अधिकृत नियुक्तीपत्र प्रदान करण्यात आले.

श्रीगोंदा तालुक्यातील अमोल कविटकर यांनी आपल्या व्यावसायिक कारकिर्दीची सुरुवात स्थानिक वृत्तवाहिनीतून केली. पत्रकारितेची आवड, बातमीमागील बारकावे समजून घेण्याची क्षमता आणि जनसंपर्क कौशल्य यांच्या जोरावर त्यांनी एबीपी माझा, साम मराठी आणि जय महाराष्ट्र यांसारख्या नामांकित वृत्तवाहिन्यांमध्ये काम करत माध्यम क्षेत्रात स्वतःची वेगळी ओळख निर्माण केली. मैदानावरील वार्तांकन, संघटनात्मक समन्वय आणि प्रभावी संवाद यामुळे त्यांनी माध्यम क्षेत्रात विश्वासार्ह व्यक्तिमत्त्व म्हणून स्थान मिळवले.

माध्यम क्षेत्रातील समृद्ध अनुभवाचा उपयोग त्यांनी पुढे भारतीय जनता पक्षाच्या संघटनात्मक कार्यात केला. पक्षाच्या विविध कार्यक्रमांचे नियोजन, माध्यमांशी समन्वय, कार्यकर्त्यांशी सातत्यपूर्ण संपर्क आणि जबाबदाऱ्या यशस्वीपणे पार पाडत त्यांनी पक्ष नेतृत्वाचा विश्वास संपादन केला. त्यांच्या याच कार्याची दखल घेत भाजपने त्यांच्यावर राज्यस्तरीय जबाबदारी सोपवत दौरा समन्वयकपदाची महत्त्वपूर्ण धुरा दिली आहे.

अमोल कविटकर हे केंद्रीय मंत्री मुरलीधर मोहोळ यांचे विश्वासू सहकारी म्हणूनही ओळखले जातात. राज्यभरातील पक्षाच्या दौऱ्यांचे नियोजन, माध्यम समन्वय आणि संघटनात्मक कामकाज अधिक प्रभावी करण्यासाठी त्यांच्या अनुभवाचा निश्चितच उपयोग होणार असल्याची भावना पक्षातील कार्यकर्त्यांकडून व्यक्त होत आहे.

चौकट - या नियुक्तीबद्दल मुख्यमंत्री देवेंद्र फडणवीस, भाजपचे प्रदेशाध्यक्ष रवींद्र चव्हाण, केंद्रीय मंत्री मुरलीधर मोहोळ, पक्षाचे मुख्य प्रवक्ते नवनाथ बन, प्रदेश माध्यम प्रमुख गोविंद येतयेकर तसेच आमदार विक्रमसिंह पाचपुते यांनी अमोल कविटकर यांचे अभिनंदन करून पुढील वाटचालीसाठी शुभेच्छा दिल्या आहेत.

अमोल कविटकर यांच्या राज्यस्तरीय नियुक्तीमुळे श्रीगोंदा तालुक्याच्या शिरपेचात आणखी एक मानाचा तुरा रोवला गेला आहे. पत्रकारितेतून राजकीय संघटनात्मक नेतृत्वापर्यंतचा त्यांचा प्रवास हा ग्रामीण भागातील तरुणांसाठी प्रेरणादायी ठरत असून, त्यांच्या या यशाबद्दल श्रीगोंदा तालुक्यासह संपूर्ण जिल्ह्यातून अभिनंदनाचा वर्षाव होत आहे.