संघर्षक्रांती वृत्तवेध - श्रीगोंदा 

दि. 21ऑगस्ट 2026

(उज्वला उल्हारे)

  करमाळा श्रीदेवीचा माळ येथे श्री जगदंबा कमलादेवी मंदिरामध्ये आज सहस्त्र श्री दुर्गा सप्तशती पाठ सेवेचे भव्य आयोजन करण्यात आले. या धार्मिक सोहळ्यास सुमारे दोन हजार महिला भाविकांनी उत्स्फूर्त सहभाग नोंदवत अत्यंत भक्तिमय वातावरणात श्री दुर्गा सप्तशती पाठाचे पठण केले. आई जगदंबा कमलादेवीच्या चरणी नतमस्तक होत महिला भाविकांनी विश्वकल्याण, सुख-समृद्धी आणि सर्वांच्या मंगलमय जीवनासाठी प्रार्थना केली.

सकाळपासूनच मंदिर परिसरात भक्तीचा आणि अध्यात्माचा जागर पाहायला मिळाला. एकसुरात घुमणाऱ्या दुर्गा सप्तशतीच्या मंत्रोच्चारांनी संपूर्ण मंदिर परिसर भक्तिरसात न्हाऊन निघाला. हजारो महिला भाविकांच्या सामूहिक पठणामुळे मंदिर परिसराला जणू शक्ती आणि श्रद्धेच्या जागराचे स्वरूप प्राप्त झाले होते.

यावेळी श्री जगदंबा कमलादेवी मंदिर समितीचे सचिव अनिल पाटील व  ॲड. लता पाटील यांच्या हस्ते विधिवत पूजा व आरती करण्यात आली. या धार्मिक सोहळ्यास मंदिर समितीचे अध्यक्ष सोमनाथ चिवटे, विश्वस्त सुशील राठोड, डॉ. रोहन पाटील, राजेंद्र वाशिंबेकर तसेच मंदिराचे पुरोहित श्याम पुराणीक, पुजारी रत्नदीप पुजारी, रामदास सोरटे, भारत सोरटे, संजय कदम, सौ. कदम, वीर सर, वीर मॅडम यांच्यासह मंदिरातील पुजारी, सेवेकरी व मानकरी उपस्थित होते.

तसेच श्रीदेवीचा माळ ग्रामपंचायतीचे सरपंच, उपसरपंच, सर्व सदस्य आणि ग्रामस्थ मोठ्या संख्येने उपस्थित राहून या धार्मिक सोहळ्यात सहभागी झाले. मंदिर समितीच्या वतीने करण्यात आलेल्या या भव्य-दिव्य धार्मिक उपक्रमामुळे संपूर्ण परिसरात उत्साहाचे आणि भक्तीमय वातावरण निर्माण झाले होते.

चौकट :

दोन हजार महिला भाविकांचा सामूहिक सहभाग

श्री जगदंबा कमलादेवी मंदिरात आयोजित सहस्त्र श्री दुर्गा सप्तशती पाठ सेवेत सुमारे दोन हजार महिला भाविकांनी सहभाग घेतला. विश्वकल्याण आणि सर्वांच्या सुख-समृद्धीसाठी हा धार्मिक सोहळा भक्तिभावाने संपन्न झाला.