संघर्षक्रांती वृत्तवेध - श्रीगोंदा 

दि. 18 ऑगस्ट 2026

(उज्वला उल्हारे)

बेलवंडी येथील बेलवंडी व्यापारी सहकारी पतसंस्थेचे सभासद दत्तात्रय विधाटे यांचे अपघाती निधन झाल्याने त्यांच्या कुटुंबावर अचानक दुःखाचा डोंगर कोसळला. अशा कठीण प्रसंगी पतसंस्थेच्या सभासद विमा योजनेने विधाटे कुटुंबाला मोठा आर्थिक आधार दिला. विमा योजनेतून मयत सभासदाचे कर्जमुक्तीबरोबरच १२ लाख रुपयांची आर्थिक मदत करण्यात आली. दुःखाच्या प्रसंगी मिळालेल्या या मदतीमुळे कुटुंबाला काहीसा दिलासा मिळाला.

या मदतीचा धनादेश पतसंस्थेचे अध्यक्ष उत्तमराव डाके यांच्या हस्ते मयत सभासदाच्या वारसदार पत्नी मनीषा विधाटे व सुषमा विधाते यांच्याकडे सुपूर्द करण्यात आला.

सभासदांच्या आर्थिक सुरक्षिततेला प्राधान्य देतानाच पतसंस्था सामाजिक बांधिलकीही जपत आहे. तालुक्यात अग्रगण्य विमा कवच देण्यासोबतच सभासदांच्या ठेवींना सुरक्षा, लाभांश (डिव्हिडंड) देण्याची परंपरा, बेलवंडी पोलीस स्टेशन अंतर्गत होणाऱ्या बेवारस अंत्यविधीसाठी मदतीचा हात तसेच गरजू विद्यार्थ्यांना शैक्षणिक मदत अशा विविध उपक्रमांतून संस्थेचे सामाजिक कार्य सुरू आहे.

या प्रसंगी संचालक सोपान हिरवे, युवराज पवार, विठ्ठल लोखंडे, अर्जुन हिवरकर, अनिल शेलार, सचिन भोसले, संपत हिरवे, राजू साळवे, राजाराम खलाटे, संदीप लबडे, आशा दरवडे, प्रवीण खेडकर, विनोद जाधव आदी उपस्थित होते.

संकटाच्या काळात विमा योजनेच्या माध्यमातून मिळालेली ही मदत विधाटे कुटुंबासाठी केवळ आर्थिक सहाय्य नाही, तर सभासदांच्या सुख-दुःखात पतसंस्था खंबीरपणे त्यांच्या पाठीशी उभी असल्याचा दिलासादायक संदेश ठरला आहे.

चौकट- यावेळी अध्यक्ष उत्तमराव डाके म्हणाले, “सभासदाच्या कुटुंबावर अचानक संकट ओढवल्यास त्यांना आर्थिक आधार मिळावा आणि दुःखाच्या काळात कुटुंबाला काही प्रमाणात दिलासा मिळावा, या उद्देशाने पतसंस्थेच्या माध्यमातून विमा योजना राबविण्यात येत आहे.”

पतसंस्थेचे सचिव किसन वऱ्हाडे यांनी सांगितले की, संस्थेच्या सुमारे ४ हजार सभासद, ठेवीदार व कर्जदारांचा विमा उतरविण्यात आला आहे. सभासदांच्या हिताला प्राधान्य देत संकटाच्या काळात त्यांच्या कुटुंबाच्या पाठीशी उभे राहण्याचा संस्थेचा प्रयत्न असल्याचे त्यांनी सांगितले.