संघर्षक्रांती वृत्तवेध - श्रीगोंदा 

दि. 5 सप्टेंबर 2026

(उज्वला उल्हारे)

सावित्रीबाई फुले पुणे विद्यापीठाच्या मराठी विभागाच्या वतीने प्रा. श्रीकांत तनपुरे यांना ‘विद्यावाचस्पती (Ph.D.)’ ही पदवी प्रदान करण्यात आली. ‘लक्ष्मण लोंढे यांच्या समग्र साहित्याचा अभ्यास’ या विषयावर त्यांनी प्रा. डॉ. राजेंद्रसिंग देवरे यांच्या मार्गदर्शनाखाली आपले संशोधन पूर्ण केले.

या संशोधनाची मौखिक परीक्षा विद्यापीठाच्या मराठी विभागात पार पडली. यावेळी बहिःस्थ परीक्षक म्हणून डॉ. केशव देशमुख उपस्थित होते, तर अध्यक्षस्थानी मराठी विभागप्रमुख डॉ. तुकाराम रोंगटे सर होते.

लक्ष्मण लोंढे यांच्या कथा, विज्ञानकथा, कादंबऱ्या, गूढकथा आणि ललित लेखनाचा समग्र व चिकित्सक अभ्यास या संशोधनातून करण्यात आला आहे. विज्ञाननिष्ठ विचार, मानवतावादी दृष्टिकोन, सामाजिक जाणीव आणि साहित्यिक अभिव्यक्ती यांचा लोंढे यांच्या साहित्यामध्ये आढळणारा समन्वय या संशोधनातून अधोरेखित करण्यात आला आहे.

प्रा. श्रीकांत तनपुरे हे श्री संत गजानन महाविद्यालय, खर्डा येथे अध्यापनाचे काम करत असताना त्यांनी शिक्षण क्षेत्रातील ही सर्वोच्च पदवी संपादित केली आहे. 

 कर्जत तालुक्यातील  दूध संघाचे संचालक दत्तात्रय तनपुरे आणि माजी ग्रामपंचायत सदस्य सौ. सुदामती तनपुरे यांचे चिरंजीव आहेत. प्रतिकूल परिस्थितीतही आई-वडिलांनी दिलेली खंबीर साथ आणि प्रेरणा त्यांच्या शैक्षणिक वाटचालीला बळ देणारी ठरली. सुरुवातीच्या काळात अनेक अडचणींवर मात करत त्यांनी पुणे येथे एम.ए.चे शिक्षण पूर्ण केले.

अध्यापनाची जबाबदारी सांभाळत संशोधनाची वाटचालही त्यांनी सातत्याने सुरू ठेवली. जिद्द, चिकाटी आणि अभ्यासू वृत्तीच्या बळावर त्यांनी संपादन केलेले हे यश उल्लेखनीय मानले जात असून, त्यांच्या यशाबद्दल सर्व स्तरांतून अभिनंदन होत आहे.