संघर्षक्रांती वृत्तवेध - श्रीगोंदा 

दि. 30 जुलै 2026

(उज्वला उल्हारे)

श्रीगोंदा तालुक्यातील लोणी व्यंकनाथ येथे शेततळ्यात बुडून दोन चिमुकल्यांचा झालेला दुर्दैवी मृत्यू संपूर्ण तालुक्यासाठी अत्यंत वेदनादायी ठरला आहे. या हृदयद्रावक दुर्घटनेत  पांडुरंग कांडेकर व  किसन कांडेकर यांच्या नाती कै. आनंदी आणि कै. वीरा या दोन्ही निष्पाप चिमुकल्यांचे अकाली निधन झाले. या घटनेमुळे परिसरात शोककळा पसरली असून सर्वत्र हळहळ व्यक्त केली जात आहे.

या दुःखद घटनेची माहिती मिळताच श्रीगोंदा विधानसभा मतदारसंघाचे आमदार विक्रमदादा बबनराव पाचपुते यांनी लोणी व्यंकनाथ येथे जाऊन कांडेकर कुटुंबीयांची प्रत्यक्ष भेट घेतली. त्यांनी शोकाकुल कुटुंबीयांचे सांत्वन करत या दुःखाच्या प्रसंगी धीर दिला आणि कुटुंबीयांच्या दुःखात आपण सहभागी असल्याची भावना व्यक्त केली.

चौकट - यावेळी आमदार पाचपुते यांनी दिवंगत आनंदी व वीरा या दोन्ही चिमुकल्यांना भावपूर्ण श्रद्धांजली अर्पण केली.निरागस वयात दोन चिमुकल्यांचे असे अचानक निघून जाणे ही अत्यंत वेदनादायी आणि मन हेलावून टाकणारी घटना आहे. या दुःखाची भरपाई कोणत्याही शब्दांनी होऊ शकत नाही, असे सांगत त्यांनी कुटुंबीयांना धीर दिला.

तसेच, दिवंगत चिमुकल्यांच्या आत्म्यास चिरशांती लाभावी आणि कांडेकर कुटुंबीयांना हे अपरिमित दुःख सहन करण्याचे बळ ईश्वर प्रदान करो, अशी प्रार्थना त्यांनी व्यक्त केली.

या प्रसंगी गावातील मान्यवर, स्थानिक पदाधिकारी, ग्रामस्थ आणि नागरिक उपस्थित होते. त्यांनीही दिवंगत चिमुकल्यांना श्रद्धांजली अर्पण करत कांडेकर कुटुंबीयांप्रती संवेदना व्यक्त केल्या. संपूर्ण गाव या दुःखद प्रसंगात कांडेकर कुटुंबाच्या पाठीशी ठामपणे उभा असल्याची भावना यावेळी व्यक्त करण्यात आली.